Дали намалувањето на бројот на купопродажби во првиот квартал ќе доведе до намалување на цените

Во последниот период се забележува намалена активност на пазарот, купувачите се повнимателни, а многумина се прашуваат:

• дали да чекаат
  
• дали цените ќе паднат
  
• или ова е сепак добар момент за купување

Едно од најчестите прашања во последниот период е дали намалениот број на купопродажби автоматски значи и пад на цените на недвижностите.

Реално, кога луѓето ќе слушнат дека има помалку продажби, веднаш очекуваат цените да почнат да паѓаат. Но пазарот на недвижности не функционира толку брзо и едноставно.

Намалениот број трансакции не значи веднаш дека становите ќе поевтинат. Пазарот на недвижности реагира многу поспоро во споредба со другите пазари. Потребно е време за да се почувствуваат реални промени во цените.

Во пракса, кога има помал број купувачи, сопствениците најчесто прво чекаат. Наместо веднаш да ја намалат цената, тие одлучуваат да го задржат имотот на пазарот неколку месеци и да видат како ќе се движи ситуацијата.

Особено кај недвижности на добра локација, квалитетна градба или атрактивни станови, продавачите не сакаат лесно да отстапуваат од цената. Тие веруваат дека ќе се појави купувач кој е подготвен да ја плати бараната сума.

Од друга страна, купувачите стануваат повнимателни, повеќе анализираат, споредуваат и преговараат. Денес има многу повеќе размислување пред да се донесе одлука за купување.

Затоа велиме дека пазарот на недвижности не паѓа преку ноќ, туку постепено реагира на економските услови, каматните стапки, побарувачката и довербата кај купувачите.

Можно е кај одредени недвижности да има корекција на цените, особено ако станува збор за преценети имоти или локации со помала побарувачка, но засега не се забележува драматичен пад на целиот пазар.

Ако гледаме што моментално се случува на пазарот на недвижности, може да се каже дека пазарот е помирен во споредба со претходните години.

Купувачите денес се многу повнимателни — повеќе анализираат, споредуваат цени и локации и ретко носат импулсивни одлуки.

Големо влијание имаат и банкарските услови. Каматните стапки, месечните рати и условите за кредитирање директно влијаат на одлуката за купување, па дел од купувачите чекаат подобри финансиски услови.

Во исто време, и продавачите се повнимателни, а има повеќе преговори и барање за попусти.

И покрај тоа, добрите недвижности и понатаму ја држат својата вредност. Најбарани се помалите станови и локации со добра инфраструктура, кои и најбрзо се продаваат.Затоа, иако пазарот е поспор, квалитетните недвижности остануваат стабилни и најмалку губат вредно.

Знам дека во моментов, да, голем дел од купувачите чекаат. Многумина веруваат дека доколку има помал број купопродажби, цените во одреден момент ќе почнат да паѓаат и затоа одлучуваат да почекаат пред да купат недвижност.

Тоа е сосема разбирливо, бидејќи секој сака да донесе добра финансиска одлука и да купи во најповолен момент. Но она што е важно да се разбере е дека чекањето не секогаш значи дека ќе се појават пониски цени.

Пазарот на недвижности зависи од многу фактори. Дури и ако цените кај дел од недвижностите се стабилизираат или благо се намалат, во меѓувреме може да се зголемат каматните стапки, што повторно ќе влијае на месечната рата и вкупниот трошок за купувачот.

Исто така, може да се намали понудата на квалитетни недвижности. Денес многу луѓе бараат добра локација, квалитетна градба и сигурна инвестиција, а таквите станови секогаш имаат побарувачка и најчесто брзо се продаваат.

Затоа често се случува луѓето да чекаат „совршен момент“, а во меѓувреме да ги пропуштат добрите можности што веќе биле на пазарот.

Реално, најдобриот момент за купување не зависи само од цената на пазарот, туку и од личната финансиска стабилност, потребата и долгорочниот план на купувачот.

Како што велиме, луѓето што чекаат совршен момент, многу често остануваат надвор од пазарот.